Lesnaður til heilsurøktara byrjar í februar og august. Útbúgvingin er samansett av trimum ástøðum á tríggjar mánaðir og tríggjar starvsvenjingar á tríggjar mánaðir. Útbúgvingin tekur 22 mðr.
Søkir tú inn til heilsurøktaraútbúgvingina ið byrjar í februar, trýst á knøttin:
Søkir tú inn til heilsurøktaraútbúgvingina, ið byrjar í uugust, trýst á knøttin:
Tú lærir um likamliga og sálarliga sjúkrarøkt, umsorgan við endurmenning, heilsufremjan og sjúkufyribyrging sum endamál. Tú arbeiðir á sjúkrahúsi, ellisheimi, sambýli ella á øðrum heilsufakligum øki.
Heilsurøktaraútbúgvingin tekur 22 mánaðar tilsamans. Tú ert trý tíðarskeið í skúla og trý tíðarskeið í starvsvenjing kring landið. Starvsvenjingarplássini eru innan eldraøkið, á sjúkrahúsi og í psykiatri.
Upptøka til heilsurøktaraútbúgvingina er treytað av, at umsøkjari hevur:
1) lokið heilsuhjálparaútbúgving, ella
2) viðkomandi útbúgvingar- og arbeiðsroyndir, sum hava vart í minsta lagi 15 mánaðir. Arbeiðsroyndir innan røkt skulu sum minsta krav vera 3 mánaðir.
Heilsuskúli Føroya tekur upp umsøkjara við støði í heildarmeting av, um umsøkjarin er førur fyri, á nøktandi hátt, at lúka krøvini í útbúgvingini.
Í heilsurøktaraútbúgvingini skal næmingurin til próvtøku 5 ferðir. Einstaki næmingurin skal til
munnliga próvtøku í heilivágslæru, náttúrulæru og í endaligari verkætlan.
Næmingurin skal harumframt til munnliga ella skrivliga próvtøku í almennu lærugreinunum føroyskum og enskum, ið mentamálaráðið trekkir út.
Øll, sum eru yvir 18 ár, hava rætt til peningaligan stuðul undir útbúgvingini. Les meira her.
Eftir lokna útbúgving eru arbeiðsøkini í høvuðsheitinum:
Sum heilsurøktari kanst tú fara víðari til proffesiónsbachelorútbúgvingar sum t.d. fysioterapeut, ergoterpeut, sosialráðgeva, sjúkararøktarfrøðing ella námsfrøðing í Danmark. Í ávísum førum kann vera krav um aðra lærugrein og støði enn í heilsurøktaraútbúgvingini. Vilt tú vita meira, kanst tú fara inn á www.ug.dk
Í Føroyum er t.d. sjúkrarøktarfrøðiútbúgvingin á støði Bachelor of science – universitetsútbúgving – har fult gymnasialt prógv er eitt krav. Harvið eitt ávíst tal av lærugreinum á A- og B-støði.
Tosa við ein lestrarvegleiðara um møguleika fyri sjálvlestri ella stakgreinalestri, um tú ynskir at søkja víðari í Føroyum.
